Estamos a punto de adentrarnos na narrativa visual dunha fotografía única, composta por unha muller dos anos 60 dentro dun coche da autoescola Miramontes. A historia está a piques de comezar.
Remontámonos á Galicia dos anos 60. Unha moi diferente á que podemos atopar hoxe en día, cun tipo de economía menos globalizada e unha dictadura que deixou pegada en nós…
Eu véñovos falar dunha pequena parte desa Galicia pasada e da miña tía Carmela. Unha muller excepcional. Aínda que a fotografía non teña os megabytes suficientes para abarcar o que representou para nós, tentarei explicalo o mellor posible.
A filla maior da familia Riveiro, sempre tivo un sorriso na cara, ainda que nesta foto a súa alegría interrompeuse polos nervos do que estaba a acontecer:
Carmela, con tan só 18 anos, procuraba coa vista o examinador, que lle daría unha liberdade moi prezada nesa idade: a posibilidade de moverse sen depender dos demais, de conseguir unha autonomía privilexiada para esa época, sobre todo sendo muller.
Nun seat 600 de cor branca, fixo historia, a súa propia historia, que hoxe teño o pracer de compartir convosco.
Autor: Ramón Salgado Alcalde – 1ASIR
